Minister Lalnghinglova Hmar chuan Anthurium Festival chu kum 2 chawlhsan lailawk a nih hnuin tunah kalphung (concept) thar - Mizo Culture leh Nature pholang thei thilte bakah Adventure lam tui mite tana chhenfakawm thei tur zawnga hmalak thar a nih thu a sawi a. 

"Tourist tam lehzual hip a nih a, ram dangte hnena Mizoram hmel mawi lehzuala tarlan a nih theih nan festival chi hrang hrang, Winter Festival, Hnahsin Kut, Leitlangpui music festival, sakawrhmuituai sunset, tlaizawng paradise etc te pawh tih changtlun a, hmun hrang hrangah chhenfakawm zawka kalpui zel tum a ni," a ti.

Tetea Hmar chuan, Hnam dangte'n min lo tlawh mai a tawk lova, Mizo leh mizo, Mizorama chengte kan intlawhpawh tam a ngai a, chumi che vel chuan kan economy a siam ni tiin, 'tourism hmangin Mizoram chawikan kan tum a ni' a ti a; hmun hrang hrang leh ram dang aṭanga he hun chhimtu mipuite chu hun hlimawm tak hmang turin duhsakna a hlan a ni, a ti.

Anthurium Festival hi October ni 1, 2026 khan tan a ni a. Festival neih chhung hian Ailawng leh Reiek-ah activity hrang hrang - Ailawng Tlang Trekking, Khuangchera Puk leh Thawmpawnga Puk Cave Expedition, Cable Foot Bridge leh Film City Visit te; Reiek Tlang leh Ngai Tlang Trekking, Ngaitei Puk, Zokhua Live Experience, Nghakuai Chiah, Mizo Indigenous Games, Rifle Shooting, Rose Garden Visit leh Kids Play Area te buatsaih a ni a; Anthurium Exhibition cum Sale leh Food Stall leh Local Product Stall te pawh hawn a ni bawk.

Mizo hnam zia leh nun dan chawilar nan Central YMA, Ailawng Branch YMA, Reiek khuaa zirna in hrang hrang leh West Lungdar Branch YMA te aṭangin hnam lam leh zai hmuhnawm tak entir a ni bawk a, zan lamah mipui nawlpui tan Mizo zaithiam lar tak tak ten concert an nei ṭhin bawk a; vawiina kharna hunah pawh hian concert neih chhunzawm niin mipui ṭhahnem takin an chhim a ni.

Tun hnaiah Mizoram-ah tourist an pung zel a, chhinchhiah danin kumin January - August chhung ringawt pawh khan Mizoramah tourist mi 6,74,911 an tling tawh.